Tiriltunge - kommuneplanten til Austrheim. I år 2000 markerte Austrheim 90 år som eigen kommune. I 1910 vart kommunen skild ut frå Lindås kommune.
Kommunevåpenet er frå 1989 og viser tre bøgde bjelkar på blå botn, der bjelkane symboliserer bruene som bind kommunen saman, og dei blå felta symboliserer himmelen over og havet under bruene. Austrheim er eit gamalt kulturområde med ein særs fin kyst. I dag er landskapet bunde saman av 13 større og mindre bruer. I kommunen møter du motsetnadene mellom det nye og det gamle gjennom vandring på historiske kulturstiar og oljeanlegget på Mongstad som kontrast.
Det vestlegaste fastlandspunktet i Noreg, Vardetangen, ligg i Austrheim. Langs den fiskerike Fosnstraumen ligg det ei rad med buplassar frå steinalderen.
